Veaigesátta

Otná sáddagis gulat dáid áššiid: Beate Ráhka Knutsen virgáibiddjo gaskaáigásaččat ođđa Árran direktevran. Dan duođašta Árrana stivrrajođiheaddji, Magne Svineng. Nu čállá Nuortta Sáltto Avijssa. Lars Magne Andreassen heaitá direktevran golggotmánus. Go birasdirektoráhtta gohčču Finnmárkku Opmodaga čorget dološ birasvahágiid, de lea dat oalát boastut. Nu oaivvildit Nuorta-Finnmárkkuráđi ja Oarje-Finnmárkkuráđi miellahtut. D2 ja Dagens næringsliv evttohit Riddu Riđđu festiválajođiheaddji Sajje Solbakka leat okta dain 30:in vuollel 30 jagi, geaid sii jáhkket bohtet dagahit máilmmi buorebun. – Hirbmat stuorra gudni ja issoras somá, čállá Solbakk iežas Facebook siiddus. Sápmi på skeiva leat doalut gos bonju dahje queer fáttát sámi servvodagas loktejuvvojit oidnosii. Dál lea Háršttáin doalut ja mii gullat ságaid doppe. Luohti, biđus ja muitalusat leat guovddážis Liksjuoe sámivahkus. Sámi jienat lávlunkoara ávvuda dán jagi 20 jagi. Dát orru maid leamen lávlunkoara maŋimuš jahki. Eai oaččo olbmuid mielde joatkit dáinna koarain.