Veaigesátta

Otná veaigesáddagis gulat dáid áššiid: Go sámedikki válgabohtosat almmuhuvvojedje mannan vahkkus, de celkui ahte bellodat Nordkalottfolket lea sámedikki válggavuoiti, sis leat dál 9 áirasa boahtte sámedikkis. Seammás maid daddjui ahte NSR,a joatká stivret sámedikki go orrot ožžon 17 áirasa ja bellodat mii sin doarjjui ovddit válgga, Guovddášbellodat orro oažžumen 3 áirasa. Sámedikkis leat oktiibuot 39 áirasa ja nu fertejit unnimusat 20 áirasa eanetlogu duogábealde. Min politihkalaš mielbargi Thor Thrane čilge eambbo dán birra. Sámediggi lea dál juolludan doarjaga nannet organisašuvnna Bivddu, mii lea sámi guolástusorganisašuvdna, sámediggeráđđi dadja su mielas lea positiivvalaš go organisašuvnnas lea čielga mihttomearri ja son lea ilus go Sámediggi sáhttá doarjut Bivddu. Sámi mánáidgárddis Guovssahasas Romssas lassána pedagogaváili dađistaga. Dál leat 50 váhnema vuolláičállán čállosa mas gáibidit rievdadusat ja doaibmabijuid gielddas dakkaviđe, čállá iTromsø, – Dilli lea dohkketmeahtton, lohká váhnen. Peder Niilas Tårnesvik buvttadii skearru pandemiija áigge ja vuittii bálkkašumi. Dál lea gearggus almmuhit iežas nuppi skearru musihkkasuorgái By:Larmmas. Dán jagi John Savio bálkkášupmi oažžui Hans Ragnar Mathisen ja dat geigejuvvui sutnje Romssa Dáiddasiiddas lávvardaga.