Veaigesátta

Otná veaigesáddagis šaddá eanet sáhka válggaid birra. Nu go ikte gulaimet, de sámedikkeválga boađus válbmana dán váhkus, dan duođaštii Sámedikki ossodatdirektevra. Johttisápmelaččaid listu doalaha áirasa Sámedikkis. Ja gullat ge joavkojođiheaddji muitaleamen movt válggat leat leamašan. Dáloniid listtu ii beassan Sámediggái, maŋŋel go válgaboađus čielggai, ja gullat ge Dáloniid listtu Isak Mathis O. Hætta muitaleamen movt šaddá dál go ii beasa Sámediggái. Máŋga unnit bellodaga masse sajis Sámediggái maŋŋá válggaid. Okta dain lea Árja. Ja eará bellodagat, nugo Olgešbellodat, Ovddádusbellodat, Dáloniid listtu ja Árja eai beassan Sámediggái dál maŋŋel válggaid. Servvodatdutkan instituhta dutki dadjá son jáhkka dasa leat iešguđetge čilgehusat, daid iešguđetge bellodagaid hárrái. Luonddugáhttenlihttu gáibida ahte ođđa rukses-ruoná ráđđehus gesset ruovttoluotta ruvkedoaibmalobi Fálesnuoris. Muhto jus Finnmárkku Bargiidbellodat oačču nu movt bellodat háliida, de sii eai doarjjo gal ruvkedoaimma bisseheami.