Buorre iđit, Sápmi

Odne lea ON:a riikkaidgaskasaš nissoniidbeaivi ja dan oktavuođas háleštit Laila Susanne Varsin Guovddážis sámenissoniid rolla servodagas ja eamiálbmot nissoniid rolla máilmmis. ON:a čalmmustahttá erenoamažit innovašuvnna ja teknologiija olahan dihte dásseárvvu. Gullat maid Ruoŧa Sámi Riikkaidbellodat ságadoalli Marianne Gråik jurdagiid dán beaivvis. Lassin gullat vel ságaid Fovsen-boazosápmelaččas. Suoma Sámi nuorat -searvvi leat guokte čielga váldoášši searvedoaimmas dán jagi. Nubbi laktasa válggaide go searvi gal áigu vástidit sámenuoraid dáirbbuide das mii guoská riikkabeaiválggaide dál giđđat ja sámediggeválggaide čakčat. Davvi-Suomas lea dán vahku skuvllalaččaid čuoiganluopmu, gullat skuvlalaččaid dálveluopmodoaimmaid birra.